‹‹ለእኔ ያላት እንጀራ›› በ ህይወት እምሻው

ግጥሞች፣ታሪኮች፣ፎቶዎች፣ሙዚቃዎች
Poems,Short stories, graphics,pictures,musics,Technology
Post Reply
selam sew
Leader
Leader
Posts: 535
Joined: 08 Feb 2011 11:14
Contact:

‹‹ለእኔ ያላት እንጀራ›› በ ህይወት እምሻው

Unread post by selam sew » 21 Sep 2018 11:30

‹‹ለእኔ ያላት እንጀራ››
በ ህይወት እምሻው
..............................
ሰው አይወጣልኝም፡፡
በሰላሳ ሰባት አመቴ ሕይወቴ ከጥቂት ሰዎች የተሰራ ነው፡፡ ሁለት በሰላሳዎቹ እድሜዬ ያገኘኋቸው የልብ የማይባሉ ጓደኞች፣ እናቴ፣ አባቴ፣ አንድ ግማሽ እህት (አባቴ ከእናቴ በፊት የወለዳት) እና ጊዜያዊ ወዳጆች፡፡
እግዜር ከሰጠኝ ሰዎች ውጪ የእኔ ብዬ ያቆምኩትና የፀና የረጅም ጊዜ ግንኙነት የለኝም፡፡ የልጅነት ባልንጀራ የለኝም፡፡ አብሬው አንድ በአል ሁለት ጊዜ ያከበርኩ የወንድ ጓደኛ ኖሮኝ አያውቅም፡፡ ሚስጥረኛ የለኝም፡፡

የፍቅር ግንኙነቶቼ አጭርና በጉድፍ የተሞሉ ናቸው፡፡ ይህ ሁሉ በልጅነቴ ያመንኩት ሰው ከድቶኝ ወንድ አላምን ብዬ ምናምን አይደለም፡፡ እስከማምነው አብሮኝ የሚቆይ ወንድ አላገኘሁም፡፡ እንተዋቃለን፡፡ የተግባባን እንመስላለን፡፡ ቡና-ማኪያቶ እንባባላለን፡፡ ክትፎ- በየአይነቱ እንገባበዛለን፡፡ ወይን -ቢራ አብረን እንጠጣለን፡፡ ቤርጎ ወይም ቤቱ ሄደን እንተኛለን፡፡ ከዚያ ሁሉ ነገር ይከስማል፡፡ ይፀድቃል የተባለው ይጠወልጋል፡፡ እንደ እሳት የተንቀለቀለው በቀናት ወደ አመድነት ይለወጣል፡፡

እንደ ሰው ባል የሚሆን ወንድ አግኝቼ መሰብሰብ፣ ልጅ ወልዶ መሳም ጠልቼ አይደለም፡፡ በጉልምስና እድሜዬ በሃያዎቹ መባቻ ላይ ሆና ጊዜ ተርፏት እንደምትሽኮረመምና ከአንዱ አንዱን የምታማርጥ ልጃገረድ በየካፌው የማይረባ ማኪያቶ የማንቃርረው፣ በየቤርጎው ያልታጠበና ሌላ ሰው-ሌላ-ሰው የሚሸት አንሶላ ላይ የምጋደመው ሰው ፍለጋ፣ ባል ባገኝ ብዬ ነው፡፡ ግን ሰው አልወጣልኝም፡፡

ለዚህ ነው መስፍን የተለየብኝ፡፡
መስፍኔ!
ቢሯችን ጨረታ ሊያስገባ መጥቶ ነው የተዋወቅነው፡፡ እንደታየሁ የወንድ ልብ ትርክክ የሚያደርግ ውበት፣ የሚያስደነብር ቁንጅና፣ እስቲ ስልክሽን አስብሎ የሚያስለምን ቁመና የለኝም፡፡ ግን መስፍን እንደሱ ሰራው፡፡

ጨረታውን እንኳን ሳያስገባ ስምሽ ማነው ብሎ ጠየቀኝ፡፡
- ማህደር…አልኩኝ ትኩር ብለው የሚያዩኝን አይኖቹን ሽሽት ጠረጰዛዬ ላይ ተመሳቅለው የተቀመጡትን ወረቀቶች እያየሁ፣ ከዚያ ደግሞ ቀና ብዬ እያየሁት፡፡
- ፐ! የሚያምር ስም…ማህ- ደር! አለ ስሜን ሁለት ቦታ ከፍሎ፡፡
ስሜን እንዲህ ከወደደው ስልክ ቁጥሬንማ በጣም ይወደዋል ብዬ ለራሴ ቀልድ ነግሬ ራሴው ፈገግ ስል
- ምነው? ፊቴ ላይ የሚያስቅ ነገር አለ? አለኝ
- አረ የለም….
- ወደሽኝ ነው?
- ሆሆ…
- ምነው የምወደድ አይደለሁም?
ሳቅኩ፡፡

የሚወደድ አይነት ነበር፡፡

ፍቅር ጀመርን፡፡

ሁለት ወር በየቀኑ በሚባል መጠን እንገናኝ ነበር፡፡ ያልተገናኘንባቸውን ጥቂት ቀናት እና ሰአታት በሌሊት የስልክ ወሬዎች እንሞላቸው ነበር፡፡
የምወደውን ስለሚወድ፣ የሚወደውን ስለምወድ ሁሉ ነገር ቀላል ነበር፡፡
ቲያትር ብንገባ ብዬ ያሰብኩ ቀን ቀድሞ ‹‹ዛሬ ቲያትር እንይ›› ይለኛል፡፡
የከቤ ኬክ ቤት ኬክ ውል ሲለኝ ፊቴ ላይ የተፃፈ ይመስል ‹‹ዛሬ ኬክ አላማረሽም? እስቲ ከቤ ኬክ ወክ እናድርግ ›› ይለኛል፡፡

የሚወደድ አይነት ነበር፡፡
ትሁት እና ደግ፣ ቁጥብና ርጋታ ያለው ሰው ነበር፡፡

ብቻንን ስንሆን ደግሞ ቁጥብነቱ ወደ ስግብግብነት፣ ርጋታው ወደ ሚያስገርም ጥድፊያ …ደስ በሚል ሁኔታ ይለወጥ ነበር፡፡ በአደባባይ በትህትና እጆቼን ይዞ እንደማይጓዝ፣ ቤት ውስጥ ለፍቅር እያዘጋጀ ሲያቅፈኝ በመሃከላችን አየር እንኳን አያልፍም ነበር፡፡

ከንፈሮቼን ተርቦ እህል እንዳገኘ ሰው ሲጎርሳቸው….
እያንዳንዳቸው አስር ጣት ያላቸው አምስት እጆች እንዳሉት ሁሉ ልገምት በማልችለው ፍጥነት መላ ሰውነቴን አንድ በአንድ፣ ግን ደግሞ ባንድ ጊዜ ሁሉም ቦታ ሲነካካኝ፣ ሲዳብሰኝ….ጀርባዬ ጋር ነው ስል ጭኖቼ ጋር…ጭኖቼ ጋር ስል ጡቶቼ ጋር…ጡቶቼ ላይ ናቸው ስላቸው ጭኖቼ መሃል የሚገቡት እነዛ ጣቶቹ….
እነዚያ ለሶስት ሰው የሚበቁ ወፋፍራም ከንፈሮቹን አስተባብሮ ጆሮዬን እየሳመ ስሜን አጣፍጦ ሲያንሾካሹክ (ማ…ዲ…ዬ…ዬ) ፍቅረ ሳንሰራ ጧ ብዬ የምፈነዳ ይመስለኝ ነበር፡፡

ወ-ደ-ደ-ኩ-ት፡፡

እኔም በተራዬ ሰው ወጣልኝ፡፡
ስንቴ የተማለድኩት ፈጣሪዬ መስፍኔን ባል አድርጎ ሰርቶ ላከልኝ፡፡

ግን ፈራሁ፡፡
ስለ መጋባት፣ ስለትዳር ወሬ ላወራው ፈራሁ፡፡ ግጣሜ መሆኑን ባውቅም በሁለት ወር ውስጥ ብንጋባስ የሚል ሃሳብ ከአፌ አውጥቼ ማስደንበሩን ፈራሁ፡፡

ግራ የሚያጋባ ሁኔታ ውስጥ ነበር ራሴን ያገኘሁት፡፡ ለጋብቻ የረፈደ እድሜዬን ሳስብ ስለ ጋብቻ አለማውራት አልችልም፡፡ ረፍዶብኛል፡፡ የሁለት ወር ግንኙነታችንን እድሜ ሳስብ ግን ስለ ጋብቻ ማውራት አልችልም፡፡ መዋከብ ይሆናል፡፡ ብሽቅ ሁኔታ አይደለም?

ሁለቱን ጓደኞቼን አማከርኩ፡፡
ቤቲ በዘወትር ችኮላዋ ፣
- ስንት አመቱ ነው? አለችኝ፡፡
ያልጠበቅኩት ጥያቄ ነበር፡፡
- ስንት አመቱ ነው እሱ? ደገመችው፡፡
- እ…እኔንጃ..
- እንዴ! አታውቂም እንዴ? እድሜውን ሳታውቂ ነው እስካሁን ላይ ታች የምትይው?
መስፍኔን እድሜውን በቀጥታ አልጠየቅኩትም፡፡ መጠየቅ ትልቅ ነገር ሆኖ ሳይሆን ያንን ጥያቄ የሚያስነሳ የወሬ ክር ስላልጀመርን ነው፡፡ አለ አይደል…ስለ ጃዋር ምናምን እያወራን ለመሆኑ አንተ እድሜህ ስንት ነው አይባል ነገር….
- አልጠየቅኩትም ግን መገመት እችላለሁ….አልኩ
- እ…ስንት ነው? ቤቲ አሁንም በጥድፊያ ጠየቀችኝ
- ኦኬ…ዩኒቨርስቲ …ግራጂዌት ያደረገው በ92 ነው….
- በእኛ?
- እንዴ ኦፍኮረስ በኛ! ይሄን ያህል ሽማግሌ አረግሽው እንዴ! አልኩ እየሳቅኩ፡፡
- የዛሬ ወንድ ምኑ ይታመናል! ለራሳቸው ሰርግ ሽማግሌ ሆነው መሄድ ሁሉ ጀምረዋል እኮ…
ሁላችንም ሳቅን፡፡

አፍታም ሳትቆይ ቤቲ ስልኳን ከቦርሳዋ በፍጥነት አወጣች፡፡ መስፍኔ በሌለበት እድሜው ሊሰላለት ነው፡፡
ጎንበስ ብላ ጠቅ ጠቅ አድርጋ ቀና ብላ አየችኝና፣
- የአዲሳባ ልጅ ነው? አለችኝ
ግር ብሎኝ…
- እሱ ደግሞ እድሜው ውስጥ ምናገባው? አልኳት
- እንዴ…የገጠር ልጅ ከሆነ ትምህርት ቶሎ ስለማይጀመር አንድ አምስት ልጨምርበት ነዋ! ብላ ስትስቅ እስካሁን ዝም ብላ የነበረቸው ሄዋንም አጀበቻት፡፡
- ወይ ጉድ..ያንቺ ጉድ ብዙ ነው…የአራት ኪሎ ልጅ ነው.. አልኩ
- ፋይን! እንግዲህ ሁለት ሺ አስራአንድ ገባን አይደል….በሃያ ሁለት አመቱ ጨረሰ ብንል እንኳን አርባ አንድ ወይ አርባ ሁለቱን ጠጥቷል ማለት ነው! አለችና ትልቅ ሚስጥር ቆፍሮ እንዳገኘ ሰው ኮራ ብላ ሶስት ጊዜ አጨበጨበች፡፡

ከግምቴ ብዙ የራቀ ስላልነበር አልተገረምኩም፡፡

- እሺ…እድሜው ይሁን እና ምንድነው ምትመክሩኝ? አልኩ ቤቲንም ሄዋንንም እያየሁ
ሄዋን ንግግሯን ለመጀመር አፏን ስትከፍት ቤቲ ቀደመቻትና
- እኔ ጠይቂውና ያበጠው ይፈንዳ ነው የምለው….እሱም ትልቅ ሰው ነው ደግሞ…ከማይሆን ሰው ጋር ጊዜሽ ዌስት የምታደርጊበት እድሜ ለይ አይደለሽም…በዛ ላይ አሪፍ ነው ምናምን ብለሻል…እና…ጠይቂው ባይ ነኝ፡፡ አለችኝ፡፡
ምክሯ አልገረመኝም፡፡ የቤቲ የኑሮ ዘይቤ ችኮላ እና ያበጠው ይፈንዳ ነው፡፡ ፍጥነት ነው፡፡ ዛሬን መኖር ነው፡፡

ሄዋንን አየኋት፡፡

- እኔ….እኔ….. ብላ ጀመረች፡፡ ልትሽከረከር ነው እንግዲህ!
-
ሄዋን አንዲት ነጥብ ለማንሳት ቃላትን ስለምትፈጅ እና የምትፈልገውን ነገር ለመናገር ጊዜ እንደምትወስድ ስለምናውቅ እኔም ቤቲም ወንበራችን ላይ ለጠጥ ብለን ተቀመጥን፡፡

- እኔ…እኔ ግን ትንሽ ብታይው ጥሩ ነው ባይ ነኝ፡፡ እኔ እንደሚመስለኝ…ማለቴ ሲመስለኝ….እስካሁን ያላገባበት ምክንያት ይኖራል…ትዳር ይፈራ ይሆናል….ወይ ደግሞ መጥፎ ነገር ደርሶበት ቢሆንስ…ለማለት የፈለግኩት ምንድነው….ቶሎ ጠይቀሽ እንዳታስደነብሪው..ቢሸሽስ? ትንሽ ብትታገሺ ከራሱ ሊመጣ ይችላል….እኔ እንደሚገባኝ…ወንዶች..ማለቴ ብዙ ወንዶች ትዳር ትዳር ሲባሉ አይወዱም…እኔ የምለው…እንደውም…እንደውም እንዲያገባሽ ከፈለግሽ ትዳር የሚባል ሃሳብ ውስጥሽ እንደሌለ ማሳመን አለብሽ…ሰናይ ሁሌ ነው ለእኔ የሚነግረኝ….ሰናይ ምን ይላል መሰለሽ….ወንድ የሚወደው እንደዛ አይነት ሴት ነው….ዛሬን የምትኖር…አለ አይደል…ነገ ነገ ማታበዛ…..አሁን እኔን አታይም? ማለቴ ሰናይን አታይም? አንድ ቀን ስለትዳር ሳላነሳበት ሁለት አመት ኖረን ነው ራሱ የጠየቀኝ…ለጓደኞቹ ምን ብሎ እንደነገራቸው ታውቂያለሽ? እንጋባ እንጋባ ብላ የማትነዘንዝ የመጀመሪያ ገርልፍሬንዴ እሷ ነበረች እያለ ነው የሚነግራቸው…..ለእኔም ምኔን ወደድከው ስለው እሱ ነው የሳበኝ ምናምን ሲለኝ ነበር…እነሱ…ማለቴ ጓደኖቹ.. ራሳቸው ታድለህ ምናምን ሲሉት ነበር…እና…ፈታ በይ…ኢንጆይ…በዛ ላይ ሴክሱ አሪፍ ነው አይደል?

ሳቅኩ፡፡
- ምናባሽ..አሪፍ ነው አይደል? አለች ሄዋን
- አዎ…በጣም… አልኩና ተሸኮረመምኩ፡፡
- ከመጋባታችሁ በፊት ኢንጆይ ኢት እናቴ! ከዚያ እንደኛ ድር ያደራበታል አለች ሄዋን እሳቀች፡፡

አብረናት ስቀን ስንጨርስ ሁለቱንም አፈራርቄ አየኋቸው፡፡

ያበጠው ይፈንዳ ባይዋ ቤቲ በሰላሳ ስድስት አመቷ አሁንም ላጤ ናት፡፡ ረጋ በይ ባይዋ ሄዋን ደግሞ በሰላሳ ሁለት አመቷ አግብታ ሁለት ወልዳለች፡፡

አላማዬ ሄዋንን እንጂ ቤቲን መሆን ስላልሆነ ልቤ ወደ ሄዋን ምክር አደላ፡፡ ሃሳቤ ፊቴ ላይ አስታወቀብኝ መሰል ቤቲ በራስሽ ጉዳይ ትከሻዋን ሰበቀች፡፡

ሺህ ጊዜ ትስበቅ፡፡

ለእኔ ያላት እንጀራ ትሻግታለች እንጂ ማንም አይበላትም ይላል ሃበሻ፡፡ ለኔ ያለው ባል ቆሞ ይቀራል እንጂ ማንም አያገባውም፡፡

እስኪጠይቀኝ አልጠይቀውም ፡፡

(ይቀጥላል)

selam sew
Leader
Leader
Posts: 535
Joined: 08 Feb 2011 11:14
Contact:

Re: ‹‹ለእኔ ያላት እንጀራ›› በ ህይወት እምሻው

Unread post by selam sew » 21 Sep 2018 11:31

ለእኔ ያላት እንጀራ
(ክፍል ሁለት)

አንዱን ቅዳሜ መስፍኔ ቤት አድሬ ካልጋ ላለመውጣት እገላበጣለሁ፡፡ ጥሎኝ ሲወጣ ተገርሜ፣
- በናትህ ዛሬ እንደ ሮማን እና ፀጋዬ አልጋ ውስጥ እንበስብስ አልኩት፡፡
የበአሉ ግርማ በተለይ የኦሮማይ ፍቅሩ ሌላ ነው፡፡ ከአስራ አምስት ጊዜ በላይ እንዳነበበው ከአስራ አምስት ጊዜ በላይ ነግሮኛል፡፡ አልጋ ውስጥ አብሮኝ ማርፈድ ከፈለገ ሁሌም የሚለኝ ነገር ነው…እንደ ሮማን እና ፀጋዬ አልጋ ውስጥ እንበስብስ፡፡
- አይ…ባንክ መሄድ አለብኝ….አለ ትላንት አውልቆ የጣለውን ካኪ ሱሪና ሸሚዝ ቶሎ ቶሎ እየለበሰ፡፡
- ባንክ? ብር ለማውጣት ከሆነ ኤቲኤም አለህ አይደል…› አልኩኝ በሌላ ጎኔ ተገልብጬ፣ በአይኖቼ ስቤ አልጋ ውስጥ ልጨምረው እየተስለመለምኩ፡፡
- አይደለም…አርባ ስልሳ ማስገባት አለብኝ…ቀኑ አልፎብኛል….ትላንት ወይንዬ የራሷን ስታስገባ የኔንም አስገቢልኝ ብዬ እሰጣታለሁ ብዬ ረሳሁት፡፡ ጫማውን ማድረግ እየጀመረ መለሰ፡፡

አርባ ስልሳ ይቆጥባል!
ልቤ በስስ ካኔተራዬ ላይ ትር ትር ስትል እስኪሰማኝ ደስ አለኝ፡፡ አርባ ስልሳ የሚቆጥብ ወንድ ስለ ወደፊት የሚያስብ ነው፡፡ ስለወደፊት የሚያስብ ወንድ ደግሞ ስለትዳር የሚያስብ ነው፡፡ ስለትዳር ካሰበ ደግሞ….

የልቤን ፈንጠዝያ በቃላት አሽጌ በአፌ ላወጣው ስል ሄዋን ትዝ አለችኝ፡፡ ‹‹እንዲያገባሽ ከፈለግሽ ትዳር የሚባል ሃሳብ እንደሌለሽ ማሳየት አለብሽ…ወንድ ልጅ የሚወደው እንደዚያ አይነቷን ነው….ሰናይን አታይም…በሁለት አመቱ ራሱ አገባኝ….››
- አርባ ስልሳ ትቆጥባለህ እንዴ…?ውይ ምስኪን….አልኩት
አልጋው ጫፍ ላይ ተቀምጦ ሁለተኛ ጫማውን እያሰረ ነበር፡፡ አንገቱን ዞር አድርጎ አየኝና፣
- ምስኪን? አለኝ
- አዎ….ህልም እኮ ነው እሱ…ዝም ብለህ ነው….እኔን አታይም? ቤተሰቦቼ ጋር በዚህ እድሜዬ የምኖረው ለምን ይመስልሃል? ተስፋ የለውም፡፡ መቶ ፐርሰንት ለከፈሉት አከፋፍለው ጨረሱት አይደል….አልኩ ቃላቶቹ እያነቁኝ
- እና ዘልአለም የሰው ኩሽና ውሰጥ ኑር ነው የምትይኝ? መሞከር አይሻልም?አለኝ ተነስቶ እየቆመ፡፡
- መሞከር…እኔ የማላውቀውን ወደፊት ለማሳካት መሞከር ምናምን አይገባኝም…ይልቅ ዛሬን ነው መኖር….

ዝም አለ፡፡

- ስማ መስፍኔ….አልኩት ጃኬቱን ለብሶ ለመውጣት ሲሰናዳ
- ወይ….
- እነ ቤቲ እኮ አስመራና ምጽዋ ሄደው መጡ….ብንሄድ አሪፍ አይደለም?
- አስመራና ምፅዋ?
- አዎ…ትኬት ውድ ነው ግን የሚያውቁት ሰው ስላለ የሆቴል ወጪ ብዙ አይኖርብንም….ለምን ሄደን ሽር ብትን አንልም…የድሮ ባህራችን ላይ?
- ከየት መጣልሽ ይሄ ሃሳብ?
- አንተ ነህ ኦሮማይ አስመራ…ኤርትራ ምናምን የምትለው….በፅሁፍ የምታውቀውን ሃገር ብታይ ደስ አይልህም?

ዝም ብሎ ሲያየኝ ቆየና
- አሁን መሄድ አለብኝ ማዲዬ፡፡ ከፈለግሽ እዚሁ ቆይኝ…ከፈለግሽ ደግሞ ቆልፈሽ ሂጂ….ብሎ ከንፈሬን ለአመል ስሞኝ ወጣ፡፡

እንደ ወጣ ለሄዋን ደውዬ ግዴለሽ የመምሰል ገድሌን ነገርኳት፡፡ ‹‹አንበሳ›› ብለ አንቆለጳጰሰችኝ፡፡ ‹በዚህ ከቀጠልሽ በአመት ውስጥ ቬሎ ትለብሻለሽ›› ብላ አበረታታችኝ፡፡
ትንሽ አብዝቼው ይሆን በሚል ጥርጣሬ ገብቶት የነበረው ልቤ ረጋ፡፡

ከሳምነት በኋላ ልደቱ ስለነበር አዲሳባ ውስጥ ምርጡን ክላርክ ጫማ ያስመጣል የተባልኩት ቤት ሄጄ የደሞዜን አርባ አምሰት ፐርሰንት ሆጭ አድርጌ ጫማ ገዛሁለትና የሚወዳቸውን ምግቦች ከሁለት ምግብ ቤቶች ገዝቼ ቤቱ ሄጄ ድግሱንም ራሴንም አዘጋጅቼ እጠብቀዋለሁ፡፡

ለአንድ ሰአት ሩብ ጉዳይ ላይ መጣ፡፡

እንኳን ተወለድክልኝ ምናምን ብዬ አቅፌ ስሜው ራት እየበላን ነበር፡፡
- ምንድነው ይሄ ሁሉ ? አለ አንዴ እኔን አንዴ ትንሷ ጠረጴዛ ላይ ተፋፍገው የተቀመጡትን የምግብ አይነቶች፣ ከዚያ ደግሞ በትልቅ ብልጭልጨጭ ወረቀት የጠቀለልኩትን ስጦታዬን እያየ፡፡ ሻማም አልቀረኝ፡፡
- ልደትህ አይደል….በደንብ ይከበርልህ ብዬ ነዋ….አልኩት ከጥብሱ ጎርሼ ቀይ ወይኔን እየተጎነጨሁ…
- እሱማ ገባኝ ግን በጣም በዛ ማዲዬ….ብዙ ወጪ ሳታወጪ አትቀሪም ለዚህ ሁሉ….
- ታዲያ ምናባቱ! እኔ ለዛሬ ነው የምኖረው ጌታዬ! አልኩ ግራ እጁን ጎትቼ ጭምቅ አድርጌ እየያዝኩ፡፡ ሰውነቴ የኔ ነው አፌ ግን የሄዋን ከሆነ ቆየ፡፡
ዝም አለ፡፡

- ደስ አላለህም መስፍኔ? እጁን እንደያዝኩ ጠየቅኩ
- ደስ ብሎኛል….ቅዝዝ ብሎ መለሰ፡፡

ራት ስንጨረስ ስጦታውን ሰጠሁት፡፡ ዋጋውን ጠየቀኝ፡፡
- እንዴት የስጦታ ዋጋ ይጠየቃል? ምናምን ብዬ አኮረፍኩት፡፡
- ውድ ይመስላል…አለኝ
- እና?
- አይ ምንም…..

ልደቱን ካከበርን በኋላ ባሉት ሳምንታት መስፍኔ ቀስ በቀስ እየተሸራረፈ ሌላ ሰው መሆን ጀመረ፡፡

ስደውል አያነሳም፡፡ ሲያነሳ ሰበብ ይደረድራል፡፡ እንደ ‹ስራ በዝቶ ነው፡፡ ስብሰባ ነበርን፡፡ ስልኬ ጠፍቶ ነበር፡፡ ካርድ አልነበረኝም›› አይነት፡፡

ቴክስት ስልክ አይመልስም፡፡ ለአስር ቴክስት አንድ ሲመልስም ሰበብ ይደረድራል ወይ ስሜት የሌለው ነገር ይፅፋል፡፡ ለምሳሌ ‹ ትንሹ መስፍኔ ናፈቀኝ….ዛሬ አብረን አናድርም?›› አይነት ነገር ፅፌለት ‹ኢን ኤ ሚቲንግ› ምናምን የሚል ከስልኩ ጋር የመጣ መጠባበቂያ መልእክት ይልክልኛል፡፡ ካልመለሰለኝ ደግሞ አግኝቼው ምነው ስለው ‹‹ካርድ የለውም ነበር፡፡ ስብሰባ አለቃዬ ፊት ተቀምጬ ስለነበር ነው›› ይለኛል፡፡

እንደ በፊቱ ቀን በቀን ቀርቶ በሳምንት አንዴ ለመገናኘት ቀጠሮ ይዘን ባለቀ ሰአት ይሰርዝብኛል፡፡ ሲዘርዝ ሰበብ ይደረድራል፡፡ እንደ ‹‹ፊልድ ሂድ ተባልኩ፡፡ እማዬን ትንሽ አመማት፡፡ ሃይለኛ ጉንፋን ይዞኛል፡፡ የወንይንዬ እናት አረፉ› አይነት፡፡
ምን አጠፋሁ ስለው ‹‹ውይ አረ ምንም›› ብሎ ይምላል ይገዘታል፡፡ ከሰበቦቹ ተርፈው በማገኘው ቀን ግን ከወትሮው ተለይቶ ዝም ይለኛል፡፡ ፊቴ ይደበታል፡፡ አጠገቡ በመቀመጤ አየሩን የተሻማሁ እስኪመስለኝ ድረስ አስሬ ቁና ቁና ይተነፍሳል፡፡

ጨነቀኝ፡፡

ጠማማ እድሌ አድብቶ እና ዘግይቶ፣ ቀስ ብሎ ሮጦ የቀደመኝ መሰለኝ፡፡ ብሮጥ የማላምጠው የአርባ ቀን እድል አለኝ ልበል? ፀደቀ ያልኩት የሚደርቅብኝ፣ ሞቀ ያልኩት የሚበርድብኝ፣ የሳሳሁለት የሚሸሸኝ ለምንድነው?

ሳምንታት በእንዲህ ሁኔተ ሲያልፉ የማደርገው ጠፋኝና ተውኩት፡፡ ሄዋን ‹‹ወንድ እንዲህ ነው፡፡ መወትወትሽን ብታቆሚ ራሱ ይፈልግሻል ››ስትለኝ ተውኩት፡፡

ግን እኔ መደወል ሳቆም በስልክም መነጋገር አቆምን፡፡
እኔ እንገናኝ ብዬ መጠየቅ ስተው መገናኘት ተውን፡፡

ጥፋቴ ሳይገባኝ እንደዛ የወደድኩት ሰው እንደ ጠዋት ጤዛ ባንዴ ታይቶ ባንዴ ጠፋ፡፡

ጠፋ- ጠፋ!

ከሰባት ወራት በኋላ…

ከመስፍኔ ህመም እንደምንም ማገግም በጀመርኩበት ሰሞን ከቤቲና ሄዋን ጋር ቁጭ ብለን ቡና እየጠጣን ነበር፡፡ ከማይረባ ብዙ ወሬ በኋላ ቤቲ በተለመደ ችኮላዋ
- ሰምተን መደበቅ ሙድ የለውም…በቃ እወቂው አለች እያየችኝ፡፡
ሄዋን ክው አለችና
- በናትሽ ቤቲ…! ራሷ ሌላ ጊዜ ትስማው በናትሽ አለች
- ምንድነው? አልኩኝ ቆጣ ብዬ…

ተያዩ፡፡

- ምንድነው ለምን አትነግሩኝም? አልኩ እንደገና ተቆጥቼ
ቤቲ ያለወትሮዋ ትንሽ አቅማማችና-
- ማዲዬ፣ …መስፍን አግብቷል፡፡ ማወቅ አለብሽ ብዬ ነው…. አለች፡፡

እሳት የተፋችብኝ ይመስል ፊቴ ተቃጠለ፡፡ በቀሰም ተነፍታ በነበልባል የምትቃጠል ዶሮ የሆንኩ መሰለኝ፡፡
አጥንቶቼ ሁሉ የቀለጡና ከስጋ ብቻ የተሰራሁ መሰለኝ፡፡ ምራቄ ከአፌ ያለቀ መሰለኝ፡፡
እንደምንም ሶፋውን ደገፍ ብዬ ሁለቱንም አየኋቸው፡፡

- ሶሪ ማዲዬ…በቃ…ተይው…..አለች ሄዋን ፀጉሬን እየዳበሰች፡፡

- ራይድ ጥሩልኝ ቤቴ መሄድ እፈልጋለሁ….ስል ብቻ ትዝ ይለኛል፡፡

ቤቴ ገብቼ አንዴ እያለቀስኩ፣ አንዴ በንዴት ጦፌ መኝታ ቤቴ ውስጥ እየተንጎራደድኩ የሆነውን ሁሉ አንድ በአንድ ሳብሰለስል ብውልም፣ ባወጣም ባወርድም ይህ ለምን እንደሆነ ሊገባኝ አልቻለም፡፡ የእኔና የመስፍኔ መጨረሻ ይሄ መሆኑ በምንም ስሌት ባስበው ሊገባኝ አልቻለም፡፡

ሞባይሌን አንስቼ ሰአቴን አየሁ፡፡ ሁለት ሰአት ከሃምሳ አምስት ደቂቃ፡፡ በጣም አልመሸም፡፡

ደወልኩት፡፡ ለመስፍኔ ደወልኩለት፡፡ ያነሳ ይሆን?
ሁለቴ እንኳን ሳይጠራ አነሳው፡፡
ይባስ ብሎ ልክ ስልኬን ይጠብቅ እንደነበር ሰው ሳይገረም ሰላም አለኝ፡፡

- ሃይ….ማህደር እንዴት ነሽ?
ማህደር? ማህደር?
- ደህና ነኝ…እንኳን ደስ ያለህ ልልህ ነው…
- አመሰግናለሁ….አንቺ ደህና ነሽ?
- ደህና ነኝ….ማውራት ትችል ይሆን? አንድ ነገር ልጠይቅህ ነበር?
- እችላለሁ….
ስሜቴን ተቆጣጠርኩ፡፡ ጉሮሮዬን ጠረግኩ፡፡ ቃላቶቼን መረጥኩ፡፡
- በዚህ ፍጥነት እንዴት አገባህ…?ማለቴ…ማለቴ ለምን እኔን ለማግባት….
ሳልጨርስ አቋረጠኝ፡፡
- ትዳር የምትፈልጊ አልመሰለኝም…ማህደር እኔ ሃያ ምናምን አመት ሙሉ ገርል ፍሬንድ ነበረኝ፡፡ በዚህ እድሜዬ ሚስት ነበር የምፈልገው….ሳይሽ ስለወደፊት አታስቢም….እና…ጊዜ ማጥፋት አልፈለግኩም….እ?
ዝም አልኩ፡፡

- ማህደር?
- አ--ለ---ሁ--- አልኩ፡፡ ግን አልነበርኩም፡፡
- እህ…ማንን ነው ያገባኸው? አልኩ የሚያውቃቸውን ሴቶች በሙሉ በአእምሮዬ ሳመላለስ መዋሌ በማያስታውቅ ሁኔታ፡፡
- እ…ወይንሸትን…ወይንዬን ነው….

ባለ አርባ ስልሳዋ ወይንሸት!

ምን ብዬ እንደጨርስኩ ሳላውቅ ስልኩን ዘጋሁ፡፡

ፊቴ እንደገና ሲነድ፣ አጥንቴ በንዴት ሲቀልጥ ይሰማኛል፡፡

አልጋዬ ላይ ተዘረጋሁ፡፡
ለኔ ያላትን እንጀራ እኔ ብገፋትም አልሻገተችም፡፡ ወይንሸት በልታታለች፡፡

Post Reply

Return to “Ethio Art and Culture..ኢትዮ ጥበብ ፤ስነ ጽሁፍ ፤”